V Ұлттық құрылтай: мемлекеттік дамудың стратегиялық бағдарлары, қоғамдық жауапкершілік және білім беру жүйесінің тәрбиелік миссиясы
Қызылорда қаласында өткен V Ұлттық құрылтайда Қазақстан Республикасының Президенті Қасым-Жомарт Тоқаевтың сөйлеген сөзі елдің қазіргі және ұзақ мерзімді даму бағыттарын айқындаған маңызды саяси әрі қоғамдық оқиға болды. Мемлекет басшысы өз баяндамасында саяси реформалардың мазмұнын тереңдету, әлеуметтік әділеттілікті қамтамасыз ету, заң үстемдігін нығайту және азаматтық жауапкершілікті арттыру мәселелерін біртұтас стратегиялық жүйе ретінде қарастырды.
Ұлттық құрылтайдың Қызылорда өңірінде өтуі кездейсоқ таңдау емес. Сыр өңірі - қазақ мемлекеттілігінің тарихи негіздері қаланған, ұлттық сананың қалыптасуында айрықша орны бар киелі аймақ. Осындай тарихи кеңістікте өткен құрылтай қоғам мен мемлекет арасындағы сабақтастықты, тарихи жауапкершілікті және болашаққа бағдарланған көзқарасты айқын көрсетті. Президент өз сөзінде ел дамуының басты тіректері ретінде экономикалық тұрақтылықты, өңірлік теңгерімді, экологиялық және су қауіпсіздігін, адами капиталды дамыту мәселелерін атап өтті. Бұл бағыттардың барлығы өзара тығыз байланысты және олардың табысты іске асуы мемлекеттік басқарудың тиімділігіне, заңдылық пен тәртіптің сақталуына тікелей тәуелді екені баса айтылды. Реформалардың формалды сипаттан арылып, нақты нәтижелерге бағытталуы - қазіргі кезеңнің басты талабы ретінде белгіленді. Ерекше назар аударылған мәселелердің бірі - азаматтық жауапкершілік пен шынайы отаншылдық ұғымы. Мемлекет басшысы патриотизмді ұранмен емес, күнделікті адал еңбекпен, заңға құрметпен, қоғамдық тәртіпті сақтаумен және әлеуметтік жауапкершілікпен өлшеу қажеттігін атап өтті. Бұл қағидаттар қоғамның тұрақты дамуы үшін ғана емес, жас ұрпақты тәрбиелеуде де негізгі бағдар болуы тиіс.
Осы тұрғыда Әл-Фараби атындағы Қазақ ұлттық университеті (https://farabi.university/)Президенттің V Ұлттық құрылтайда айқындаған стратегиялық бағыттарын толық қолдайды, сондай-ақ университеттің жоғары оқу орнына дейінгі дайындық кафедрасының ұжымы Мемлекет басшысы ұсынған қағидаттар мен бастамаларды өз қызметінің маңызды бағдарлары ретінде қабылдайды. Университет қауымдастығы білім беру жүйесінің негізгі миссиясы тек академиялық білім берумен шектелмей, қоғам алдындағы жауапкершілікті сезінетін, құқықтық мәдениеті жоғары, ұлттық құндылықтарды құрметтейтін тұлға қалыптастыру екенін айқын түсінеді.
Жоғары оқу орнына дейінгі дайындық кафедрасында жүзеге асырылып отырған оқу-тәрбие үдерісі білім алушылардың азаматтық ұстанымын, тарихи санасын, әлеуметтік белсенділігін және сыни ойлау қабілетін дамытуға бағытталған. Бұл жұмыс жастардың жоғары білімге саналы түрде қадам басуына, болашақ кәсіби жолын жауапкершілікпен таңдауға және ел дамуына үлес қосатын азамат ретінде қалыптасуына негіз болады.
Білім беру кеңістігінде жүргізіліп отырған осындай жүйелі тәрбие жұмысы Мемлекет басшысы атап өткен «әділетті қоғам», «заң мен тәртіп», «жауапты азамат» қағидаттарының нақты іске асуының бір көрінісі болып табылады. Университеттік ортада қалыптасатын құндылықтар мен көзқарастар болашақта қоғамның әлеуметтік, экономикалық және саяси тұрақтылығына тікелей әсер ететіні сөзсіз.
Ұлттық құрылтай - бұл тек пікір алмасу алаңы ғана емес, елдің даму философиясы қалыптасатын, ортақ құндылықтар мен стратегиялық мақсаттар айқындалатын маңызды қоғамдық институт. Осындай бастамаларды қолдау - жоғары оқу орындарының, ғылыми-педагогикалық қауымдастықтың азаматтық жауапкершілігінің және ел болашағына бейжай қарамайтын ұстанымының айқын дәлелі. Осылайша, V Ұлттық құрылтайда көтерілген идеялар мен ұсыныстар Қазақстанның тұрақты дамуына, қоғамдық келісімді нығайтуға және саналы ұрпақ тәрбиелеуге бағытталған маңызды бағдарлар ретінде бағалануы тиіс.
Авторы:ЖОО дейінгі дайындық кафедрасының аға оқытушысы А.Қ. Бегалиева
